點解你唔嬲我既？

深夜一時多，砵蘭街這麵店仍有不少客人，不見疑似馬伕，也不見「少布」女孩，客人都是草根階層，他們究竟是什麼人？每月賺多少錢？我今天就被人問着這些問題。

中午坐巴士返公司，對面坐位有一個穿上花T恤黑褲的肥胖中年女士，她見我坐下不久，就發問；「送文件嗎？」吓，我的樣子像送文件嗎？或許身旁的黑色大袋像文件袋。她繼續跟我說話，以下是大家的對話，◎是她，●是我。

◎我係中環送外賣，番五個鐘，得二千蚊咋，好少錢，不過有兩餐食，四十七歲，又有精神病，無人請啦！
●你同邊間店送外賣，有嘢做，咪做住先囉，好過無嘢做，又有兩餐食，慳番啲啦！
◎我係X興做，個度有三十幾個伙記，我唔駛清潔，剩係送外賣，呢，長江大廈個度。你做寫字樓呀，而家番工。番到半夜？
◎萬幾蚊個月呀？
●係呀。
（她問什麼，我基本上都答係）
◎你就好啦，你細個我呀？
●係呀。
◎細好多呀！
●係呀。
◎未結婚呀？
●係呀。
◎同細佬妹住呀？
●係呀。
◎我細佬死咗，阿爸先幾年死埋，而家同阿媽住。你知唔知有無得收樓呀？
●你住邊度？
◎北角X秧街幾層樓，樓上冷氣成日滴水，投訴都都無人理。
●佢地恰你啫，不過有樓住，幾好吖，要係收樓範圍先有得收,你個度應該唔係囉，嗱，放咗工周圍行吓啦，香港地好靚架。
◎點解你唔嬲我既？
●點解要嬲你？
◎我同啲人傾偈，佢地會好嬲。我行前面，落車啦！

不久，她下了車，並揪一揪那黑色褲，勒緊她那大肚腩。(草稿於15/7/2008深夜)